बन्द राजमार्ग खुलाउन सुरक्षासमितिको बैठक चौतारामा जारी

काठमाण्डौ, माघ १८ (झुम्का डटकम), सडक दुर्घटनाको विषयलाई लिएर स्थानीय वासिन्दाले गरेको प्रदर्शनका कारण आज बिहानैदेखि अरनिको राजमार्ग अवरुद्ध बनेको छ । काठमाण्डौबाट सिन्धुपाल्चोकको बाह्रविसे जाँदै गरेको बा २ ख ३६४३ नम्बरको बसले गएराति बा ३१ प ३९४७ नम्बरको मोटरसाइकललाई ठक्कर दिँदा सिन्धुपाल्चोक फलाँटेका लीला श्रेष्ठको मृत्यु भएको विरोधमा उनका आफन्तले आज बिहानैदेखि प्रदर्शन गरेका हुन् ।

प्रदर्शनका कारण अहिले अरनिको राजमार्ग हुँदै यात्रा गर्ने हजारौं यात्रु बीचबाटोमै अलपत्र बनेका छन् । स्थानीय वासिन्दाले अरनिको राजमार्गको बन्देउ, तातोपानी, जिरी–लामोसाँघु सडक खण्डको खाडीचौर र बाह्रविसेमा टायर बालेर प्रदर्शन गरिरहेका छन् ।

अवरुद्ध राजमार्ग खुलाउने विषयमा जिल्ला सदरमुकाम चौतारामा अहिले जिल्ला सुरक्षासमितिको बैठक बसिरहेको बताइएको छ ।मोटरसाइकलको पछाडि रहेका श्रेष्ठको गाडीको ठक्करबाट घटनास्थलमै मृत्यु भएको थियो ।