सफल भयो–अमिताभको अप्रेशन

मुम्बई–माघ २८, एजेन्सी– वलिउडका महानायक अमिताभ बच्चनको पेटको अप्रेशन सफल भएको र अहिले आराम गरिरहेको बताइएको छ । समाचार स्रोतहरुका अनुसार बिग बि उपनामले परिचित बच्चनपुत्र अभिषेक बच्चनले आफ्नो पिताको अप्रेशन सफल भएको र आराम गरिरहेको जनाएका छन् ।

अभिषेकले आफ्नो सोसिएल नेटवर्क साइटमा– ‘प्रशंसकको शुभकामनालाई धन्यवाद, बुबाको अप्रेसन सफल भयो, उहाँ अहिले आराम गरिरहनु भएको छ ।’ लेखेको स्रोतले उल्लेख गरेको छ ।

स्रोतले अमिताभ बच्चनको पेटको अप्रेसन मुम्बईस्थित अन्धेरीमा रहेको सेवेन हिल्स अस्पतालमा भएको जनाइएको छ । त्यस्तै वलिडका किङ खान शाहरुख खानले पनि आफ्नो सोसिएल साइट ट्वीटरमा बच्चनको शीघ्र स्वास्थ्यलाभको कामना गरेको बताइएको छ ।

अमिताभ बच्चनले एक हिन्दी ब्लगमा आफ्नो अप्रेसन ११ फेब्रुवरीको दिन हुन लागेको बताएका थिए । त्यस्तै अमिताभ बच्चनलाई १९८३ मा रिलिज र हिट भएको फिल्म कुलीको सुटिङकाताका पेटमा चोट लागेको थियो । अमिताभले ६ वर्षअघि पनि पेटको अप्रेसन गराएको भारतीय  सञ्चारमाध्यमहरुले जनाएका छन् ।