आतंकवादीलाई आफ्नो भूमि प्रयोग गर्न नदिन पाकिस्तानलाई सुझाव

अमेरिकी राष्ट्रपति डोनाल्ड ट्रम्प र भारतीय प्रधानमन्त्री नरेन्द्र मोदीले संयुक्त विज्ञप्ती जारी गर्दै आतंकवादीलाई आफ्नो भूमि प्रयोग गर्न नदिन पाकिस्तानलाई सुझाव दिएका छन् । वासिङ्टन डिसीमा दुई नेताले भेटवार्ता गरेलगत्तै ह्वाइट हाउसले जारी गरेको विज्ञप्तीमा पाकिस्तानलाई दिइएको यो सुझाव उल्लेख छ । 

पछिल्ला समय दिल्लीमा भएका केही आक्रमण पाकिस्तानमा रहेका समूहले गराएको भारतीय दाबीका बीच दुई नेताको यस्तो प्रतिक्रिया आएको हो । दुई नेताले दुई देशबीचको व्यापार बृद्धि गर्ने बिषयमा पनि छलफल गरेको विज्ञप्तीमा उल्लेख गरिएको छ । भारतीय प्रधानमन्त्री मोदी र अमेरिकी राष्ट्रपति ट्रम्प आपसमा भेट भएको यो पहिलो पटक हो । भारतीय प्रधानमन्त्री हाल अमेरिका भ्रमणमा छन् ।

काश्मिरी विद्रोही सायद सलाहुद्दिनलाई आतंकवादी सूचीमा राख्न अमेरिकाले गरेको सहयोगको भारतले प्रसंशा गरेको ह्वाइट हाउसद्वारा जारी विज्ञप्तीमा उल्लेख छ । संयुक्त विज्ञप्तीमा दुवै नेताले पाकिस्तानलाई ‘अर्को देशमा आक्रमण गर्न आतंकवादी संगठनलाई आफ्नो भूमि प्रयोग गर्न नदिन सुझाव दिएको’ उल्लेख छ । 

विज्ञप्तीमा दुवै नेताले पाकिस्तानलाई आधार बनाएर आक्रमण गर्ने गरेको आरोप लागेका आतंकवादी समूह जैस–ई–मोहम्मद र लक्सर ई ताइबाको चुनौतिविरुद्ध संयुक्त पहल चाल्ने सहमति भएको बताइएको छ ।

दुवै नेताले पाकिस्तानलाई सन् २००८ को मुम्बई आक्रमण र गत वर्ष पठानकोटमा भएको आक्रमणमा संलग्न भनिएको समूहलाई कानुनी कठघरामा ल्याउन पाकिस्तानसँग माग गरेका छन् । भारतले उक्त दुवै आक्रमण पाकिस्तानलाई आधार बनाएका दुई आतंकवादी समूहले गरेको दाबी गर्दै आएको छ ।

रोयटर्सले जनाएअनुसार भारतीय प्रधानमन्त्री मोदीले दिएको भारत भ्रमणको निम्तो अमेरिकी राष्ट्रपति ट्रम्पले स्वीकार गरेका छन् । ट्रम्प अमेरिकी राष्ट्रपति हुनुअघि भारत भ्रमणमा आएका थिए । भारतीय प्रधानमन्त्री बनेपछि मोदीको यो पाँचौं अमेरिका भ्रमण हो ।