इजिप्टको पोर्ट सेद शहरमा दुई विपक्षी फुटबल टोलीका समर्थकबीच झडप हुँदा ७४ जना मारिएका छन् । शीर्ष क्लबहरु अल मास्री र अल आहलीबीच खेल सकिएलगत्तै मैदानमै दर्शकबीच झडप भएको थियो । चक्कुसहितका धरिला हतियार बोकेका दुई क्लबका समर्थकको झडपमा ७४ जना मारिएका हुन् भने दर्जनौ घाइते भएका छन् । अन्तर्राष्ट्रिय समाचार संस्था एपीका अनुसार मृतकमा केही प्रहरी पनि छन् । गएरातीको खेलमा स्थानिय अल मास्री क्लब ३–१ ले विजयी भएपछि मैदानमा झडप शुरु भएको थियो । इजिप्टको शीर्ष क्लब अल आहली पराजित भएपछि उत्तेजित दर्शकले दंगा शुरु गरेका थिए । अल्ट्रास उपनामले चिनिने अल आहली क्लबका समर्थकलाई विश्वकै उग्र फुटबल समर्थक समूह मध्येको एक मानिन्छ ।मैदानमा झडप सुरु भएपछि पाहुना टोली अल आहलीका खेलाडीहरुलाई सैनिक विमानमार्फत राजधानी कायरोस्थित सैन्य शिविर पु-याईएको थियो । ईजीप्टका सरकारी अधिकारीहरुले यो झपडलाई राष्ट्रिय फुटबल खेलको ईतीहासकै दुखद घटना बताएका छन् । घटनाले ईजीप्टको कमजोर सुरक्षा अवस्थालाई पनि उजागर गरेको छ । गत वर्ष होस्नी मुबारकको शाशन विरुद्ध भएको सफल विद्रोहपछि ईजिप्टमा प्रहरीको मनोबल निकै गिरेको बताईन्छ । यसैको कारण पनि रंगशालामा व्यापक प्रहरी उपस्थित हुँदासमेत संभावित झडप नियन्त्रण गर्न प्रहरी असफल भएको बिबिसीले जनाएको छ ।
No comments:
Post a Comment