विशेष समितिको टोली शिविर तर्फ

स्वेच्छिक अवकाश रोजेका माओवादी लडाकुको बिदाई प्रक्रिया थाल्न विशेष समितिमातहतको सचिवालयको टोली लडाकु शिविरका लागि आज राजधानीबाट हिँडेको छ । टोली साँझदेखि भोलि बिहानसम्ममा ७ मुख्य र २८ सहायक शिविरमा पुगिसक्ने सचिवालयले जनाएको छ । प्रत्येक टोलीमा शिविरमा रहेका लडाकु संख्याका आधारमा ८ देखि १२ जनासम्म रहेका छन् । विशेष समितिले माघ १७ देखि नै बिदाई प्रक्रिया थाले निर्णय गरे पनि माओवादीले बखेडा झिक्दा ढिलाई भएको विपक्षी नेताहरुले बताएका छन् । लडाकु बिदाइको काम भोलिदेखि मात्र औपचारिक रुपमा सुरु हुनेछ ।

स्वेच्छिक अवकाश रोजेका लडाकुलाई राहतस्वरुप दिइने रकमको पहिलो किस्ता उपलब्ध गराएर बिदाई गरिने छ । विदाईका लागि लडाकुको बैंक खाता खोल्ने र चेक बनाउने काम सकिएको जनाइएको छ । पुनवर्गीकरणका क्रममा १९ हजार ६ सय २ मध्ये ७ हजार ३ सय ६५ लडाकुले स्वेच्छिक अवकाशको विकल्प रोजेका थिए । अवकाश रोजेका लडाकुलाई १२ दिनभित्र बिदाई गरिसकेर बाँकी रहेका लडाकुलाई १४ वटा शिविरमा केन्द्रित गर्ने र १४ शिविर खाली गर्ने विशेष समितिको योजना छ । अवकाशमा जानेलाई बिदा गरेपछि समायोजनामा जाने लडाकुको प्रक्रिया अगाडि बढाइने छ ।