आपसी विवादमा आज उपत्यकाका सबै निजी विद्यालय बन्द

विद्यार्थी तथा अभिभावक आक्रोशित काठमाण्डौ, माघ १९ । शिक्षक निष्कासनको विषयलाई लिएर नेपाल शैक्षिक गणतान्त्रिक मञ्चले आज राजधानीका निजी विद्यालय बन्दको आह्वान गरेको छ । मञ्चको आह्वानका कारण आज बिहानदेखि नै राजधानीको निजी विद्यालयको पठनपाठन कार्य ठप्प बनेको छ । राजधानीको कपनमा रहेको ड्याफोडिल बोर्डिङ्ग स्कुलका शिक्षकद्वय रमेश दंगाल र विजेन्द्र प्रधानलाई विद्यालयले निष्कासन गरेको विरोधमा मञ्चले विद्यालय बन्दको आह्वान गरेको हो । विद्यालयका प्रिन्सिपल हरि दाहाल र मीना कार्कीले आफूहरुलाई गुण्डा प्रयोग गरी ७ घण्टासम्म थुरेर चरम यातना दिएको आरोप प्रधान र दंगालले लगाएका छन् । उनीहरुले ड्याफोडिल बोर्डिङ्ग स्कुल अनिश्चितकालका लागि बन्द गर्ने घोषणा गरेका छतन् । निष्कासित शिक्षकहरुलाई पुर्नबहाली र विद्यालय प्रशासनले क्षमायाचना गर्नुपर्ने उनीहरुको माग छ । यता एउटा विद्यालयमा शिक्षक र प्रिन्सिपलबीच भएको विवादका कारण राजधानीका अरु सयौं स्कुलहरु बन्द गरेपछि ती विद्यालयका विद्यार्थी तथा अभिभावक आक्रोशित बनेका छन् । ठूलो लगानी गरेर आफ्ना छोराछोरीलाई स्कुल पठाइएको भएपनि यो या त्यो बहानामा स्कुल बन्द हुनु दुखद विषय भएको उनीहरुको भनाई छ ।